Lo matremmonio a fforza

by Molière

 EPUB   MOBI   PDF   RTF   TXT

 

LO MATREMMONIO

A FFORZA.

---

LO MATREMMONIO

A FFORZA

FARZA DE MONZÙ MOLIERO

VOTATA A FFARDA

DA LO BARONE MICHELE ZEZZA.

 

---

 

NAPOLE

DA LI TRUOCCHIE DE LA SOCIATA' FREMMATECA.

---

1835.

PERZONAGGE

D. ANIELLO, nnammorato de D. Chiarina.

D. CIOMMO, ammico de D. Aniello.

D. CHIARINA, figlia de D. Beneditto.

D. PEPPINO , frate de D. Chiarina.

D. BENEDITTO.

D. PANCRAZIO, fìloseco aristoteleco.

D. MAMOZIO, fìloseco pirronista.

MARIUCCIA zincara.

TATANELLA zincara.

La scena se rappresenta mmiezo a na cchiazza.

SCENA PRIMMA

D. Aniello, parlanno a no criato nfacce a la porta de la casa soia.

    Sette-panelle mmalorato, spilate
Chesse recchie de ciuccio, e ssiente buono.
Io vaco, e ttorno subbeto. Ntramente
Tu arresedia la casa, e no mme fare
A lo ssoleto tuio quarche dammaggio.
Si vene bona ggente
A pportarme denare,
Tu rumpete la noce de lo cuollo,
E da Don Ciommo vieneme a cchiammare:
Si po assomma qua pittema cordiale,
P’asiggere cambiale,
Tu dille: Lo patrone è asciuto, e ddorme…
No! dille: Lo patrone è asciuto, e ttorna
Quanno de San Martino la campana
Co cientomilia botte
Dà lo nsignale de la meza notte.

SCENA SECONNA

D. Ciommo, ch’ave ntiso sto trascurzo, e Dditto.

D.C. (Ssa mmasciata è da vero Macchiaviello.)

D.A. Oh chi veco! Don Ciommo, mm’è ccaduto

Lo maccarone int’a lo ccaso: io t’aggio

Da parlare sottile.

D. C.⁠ Che t’accorre?

D.A. Mme ronnea pe la capo no moschillo;

E mme voglio co ttico consigliare.

D.C. Don Aniè, tu me duommene a bacchetta,

E sto ccà pe sservirte a barda, e a ssella.

D. A. Mettimmonce a sto pizzo,

E tt’arapo sto core; ma prommitteme

De mme ddì pane pane, e bino vino

Lo sentemiento tuio.

D.C. ⁠Ccommenza a ddicere.

D A. Mm’è benuta la mingria de nzorarme.

D.C. Vattenne; tu coffie?

D.A. ⁠Parlo addavero.

D. C. Quann’è cchesto, mprimisse, e nnantemonia

Dimme…

D.A.⁠ Che buoie sapè?

D.C.⁠ Quant’anne tiene.

D.A. Non tte pozzo servì, ca no lo ssaccio.

Saccio mperò ca tengo na salute

De toro bufalino.

D.C.⁠ E ttu no ssaie

L’aità che tiene?

D.A.⁠ Oh bella!

Comme fosse na scienzia necessaria.

D.C. Mbè, respunneme a ttuono.

Quanno nce canoscettemo a lo Muolo,

Quant’anne avive?

D.A.⁠ Dicinnove, o vinte.

D.C. Pe quanto tiempo stettemo mpiagate

Nzieme a Pezzulo?

D.A. ⁠Pe sett’anne.

D.C.⁠ E ddoppo

Tu passaste a Ccaserta? e llà nce stiste?

D.A. Ott’anne.

D.C. ⁠Te mannaieno a Gaeta,

Addò stiste…

D.A. ⁠Cinc’anne, e ssette mise

D.C. Quanno tornaste?

D.A. ⁠Dudece anne arreto.

D.C. Me canosciste de vint’anne: stettemo

A Pezzulo sett’anne,

E ssongo vintisette: iste a Caserta

P’ott’anne, e stammo a trentacinco: appriesso;

Te spassaste a Gaeta pe cinc’anne,

E. assommano a quaranta la taverna.

Da dudece anne sì tornato; e ssenza

La fede de vattisemo tte dico

Ca so cinquantaduie belle, e ssonate.

D.A. Arrassosia! Gnernò! Don Ciommo mio,

Piglie pizze pe ttuortane.

D.C.⁠ Mmalora!

Ccà se tratta de somma, e non de gabbola

De Bonafficiata. Io comm’ammico

A llettere de scatola tte dico,

Ca si no Don Liccardo gioveniello

S’ha da fare lo cunto co le deta,

Pe poterse nzorare,

Uno de l’aità nosta ha da penzare

Ca facenno le nnozzole,

Po le nnozzano ncanna. Leva suono,

E ccaccia sso penziero qua tentillo.

Si sì stato nfì a mmo bello, e ccoieto,

Siente l’ammico tuio, che non te nganna,

Non te mettere no sso chiappo ncanna.

D.A. Co cchella puca d’oro che me nguadio

Sso chiappo n’è de cannevo,

Ma de zuccaro fatto da Barbato,

Che sta mmiezo Toleto.

D.C. Chi sapea tutto chesto? Mo te spieghe

Comm’a libbro stracciato.

D.A. ⁠ La fegliola

Ch’io voglio pe mmogliera

Pare na primmavera; e l’ammo assaie.

D.C. Le vuoie bene de core?

D.A. ⁠Sissignore,

Già parlaie co lo patre; e ppe stasera

Li capitole fuorze se farranno.

D.C. Quann’è cchesto, m’attocca

De metterme da mo no punto mmocca.

D.A. Lassammo sta l’aità; penzammo schitto

A la salute. Io so no merolillo,

Smerzo Napole a ppede,

E non nce spenno maie

Manco na cinco rana a lo vapore.

Tengo tutte li diente,

Che bonno mazzecare fitto fitto:

Nè miedece, geruggeche,

Varviere, e speziale

Ponno fa ncopp’a st’ossa capitale.

D.C. No nc’è peo ch’avè tuorto:

Nzorate priesto, Don Aniello mio.

D.A. È no sfizio vederte sempe rente

Na mogliera ammorosa, e na dozzana

De peccerille, che tte rassommegliano

Comm’a le sghizze d’acqua,

E ntartaglianno chiammano papà.

D.C. Beneditto puozz’esse!

D.A.⁠ Me l’appruove?

D.C. Ma comme! D.A.⁠ Vero ammico!

D.C. ⁠E cchi te piglie?

D.A. Donna Chiarina.

D.C. ⁠Chella fegliolella,

Che ba sempe terata a quatto spingole?

D.A. Gnorsì.

D.C.⁠ La figlia de Don Beneditto?

D.A. Nce aie nnevenato, signorsì.

D.C. ⁠La sora

De no cierto… no cierto Don Peppino,

Che fa lo guappo, e ffete d’esse acciso?

D.A. Iusto chesta. Don Ciò, tu che ne dice?

D.C. Dico, sposala craie.

D.A. ⁠Ma saccio scegliere?

D.C. Canchero! e ccomme!

D.A. ⁠Ammico. me consuole:

Tu lo primmo sarraie de li mnmitate.

D.C. Verraggio in abbigliè, co spata e bborza.

Pe mmo t’aggio a llasare.

D. A. Statte buono, e ggovernate.

D. C.⁠ Bonnio.

(Co chess’arucolella de semmenza

Che te piglie pe sposa,

Vuò sta frisco, compà, comm’a na rosa.)

SCENA TERZA

D. Aniello sulo.

    Quanno se ngarra no niozio, è proprio
No gusto de signore: tutte chille
Che senteno da me sto matremmonio,
Fanno lo pizzo a rrisa,
Pocca non ponno metterce l’assisa.
N’ommo de me cchiù sapio ed asciortato
No ne’è, no nce sarra, nè maie nc’è stato.

SCENA QUARTA

D. Chiarina parlanno co la cammarera che porta appriesso, e Dditto.

D.C. Iammoncenne, Rosè, iappeca iappeca.

D.A. (È addavero na luna nquintadecema.)

Non ve sia pe ccommanno, signorina,

Zita futura de futuro zito,

Addò iate?

D.C.⁠ Facenno spesolelle

Da Monzù… da Monzù Chichirichì,

Arrevato l’autr’iere da Parì

D.A. È lo vero sì, o no, gioia d’Aniello,

Ch’avrà la casa, anze la stalla mia

L’annore d’alloggiarve

Vita vosta durante? Responnite,

Ma responnite a buolo,

Site contenta de sto bis, e bolo?

D.C. Io me zuco le ddeta p’allegrezza.

Lo gnore m’ha tenuta, arrassosia,

Nfì a mmo co quatto piede int’a na scarpa.

Io, pe ffà zo che boglio, iev’ascianno

E pe mmare e pe tterra no marito.

Vuie pe mme site stato

N’acqua de Maggio.

D.A.⁠(Nc’è mal’aria a Baia.)

D.C. Me potraggio spassare e nnotte, e ghiuorno

A triate, a festine, a ghiuoco, a bballe;

E mme voglio sfrenare nzine fine.

D.A. (Oh che mme sento scenne pe li rine!)

D.C. Comm’assomma Settembre,

A Ppuortece iarrammo a belleggiare;

Emme farrite comparè qua ddanma.

D.A. (lo me sento scolare a sdramma a sdramma.)

D.C. Maramè! Vuie ch’avite?

Ve site fallo nfacce ianco ianco.

D.A. Mm’è benuta na doglia int’a lo scianco.

D.C. Corre ssa malatia. Pe mmo penzate

Schitto a sposà. Stateve buono: io vaco

P’ordenà lo corriero a li mercante,

A le mmodiste, scuffiare, ezzetera;

E ve manno le nnote pe ppavare;

Nè ppenzate a docate cchiù, o meno.

D.A. (Io mo me dolarria, si fosse prieno.)

SCENA QUINTA

D. Ciommo, e Dditto.

D. C. Don Aniè, che piacere ch’aggio avuto

D’asciarte ancora ccà! No gioiegliero

Ca tu spuse ha saputo,

E bennerte vorria

L’aniello de la fede de brillante,

Bello isso sulo, a bera concia ngrese.

Già te truove a ffà spese.....

D. A.⁠ Ammico mio,

Io non vaco de pressa.

D. C. ⁠Che ne vutte?

Poco nnante pareva che bolive

Retto trammete corre da l’Aletto,

Pe ffà l’atto cevile?

D. A.⁠ Mm’è benuto

Quarche scrupolo ncapo pe st’affare.

Voglio farme spiegà primmo no suonno

Ch’aggio fatto sta notte, e ffitto fitto

Peo de chiuovo mme percia lo cerviello.

Saie che li suonne songo

Comm’a spiecchie, e annevinano qua bota

Zo, che po tte soccede.

Mme parea de stà minare nfacce a Nniseta,

E cco biento contrario,

Ienno la varca ad orza…

D. C. Pare no peccerillo: da sso suonno

Caccia nummere cierte, e ghiocatelle.

Ma pe lo matremmonio, puoie parlarne

Co chille duie filoseche, che stanno

De ccasa a tte becine: anze consigliale

Uno pe bota, e ddoppo

Te resuolve sì, o no de te nzorare.

Io ntramente me spiccio quarche affare.

SCENA SESTA

D. Pancrazio parlanno a quarcuno dint’a la scena, e D. Aniello.

.

D.P. E battenne a mmalora! Tu non saie

Si sì bivo. Tte voglio fà a ccanoscere

Co Arestotele mmano, ca sì ciuccio

E ccauzato, e bestuto.

D.A.⁠ (Chist’arriva

Iusto a ttiempo.)

D.P.⁠ Che bello selloggismo!

La maggiore non bale quatto calle,

La minore la cagne a ffave, e ccicere,

La conseguenzia tte la sbatte a ll’uocchie.

D.A.Don Pancrà, vuie ch’avite?

D.P. ⁠Oh, D. Aniello,

Ve so schiavo. No cierto Pacchesicco

Volea fà lo dottore; e mme deceva

Ca lo cappiello ha forma, e non fegura;

Mente la forma è schitto

De le ccose anemate, e la fegura

De chelle inanemate. Ed Aristotele

Ste cose l’ha spiegate

Dint’a lo libbro suio De Qualitate.

D.A. Vuie avite raggione, ma…

D.P. ⁠È na bestia? D.A. Arcibestia.

D.P. ⁠Ciuccione?

D.A. ⁠⁠Co la sarma.

Ma lassammo mo stare le ffegure,

Le fforme, li cappielle, e le perucche,

E ssentite.

D.P. ⁠Ma vuie de quale lengua

Ve servite, parlannome?

D.A.⁠⁠ De chella,

Che tengo mmocca. Vaco allengue mpriesteto?

D.P. Io ntenno lo lenguaggio, Grieco, Turco,

Ngrese, Latino, Abbrejo, o Taliano?

D.A. Niente de tutto zo; Napolitano.

D.P. E mmettiveve donca a mmano manca,

Pocca co cchella recchia:Sento parlare li lenguagge nuove,

E co la ritta chille viecchie, e addotte.

D.A. (Nc’è porzì l’atechetta a lo ssentire?)

Io me vorria nzorà co na figliola

Isella essa sola; ma vedenno a cierte

Trascurze soie, ca nce sarriano guaie…

D.P. (non danno recchie a D. A.)

Co la parola l’omino

Li penziere tte spiega; e li penziere

Sò li ritratte de le ccose, comme

Sò porzì le pparole li ritratte

De li penziere. Chiste….

D.A. (Mettenno la mano nfacce a la vocca

de D. P.)

E cche mmalora? S’è spilata Patria.

D.P. Chiste songo ritratte origgenale:

E cchi penza cchiù fino,

Cchiù fino parla. Iate mo decenno.

D.A. (Vottanno D.P. dint’ a la casa soia,

e nserranno la porta)

Ca tte venga no canchero a la vocca!

D.P. (Affacciannose a la fenesta.)

La parola ched è ? Speculum animi.

Donca armate sso specchio, e ddate fuoco.

D.A. Darria fuoco, ma vuie no mme facite

Cchiacchiarià.

D.P. ⁠Sia lo trascurzo vuosto

Laconeco, e zucuso.

D.A. ⁠⁠Sissignore.

D.P. Senza cchille vocabbole antequate.

D.A. (Piglianno doie vrecce da terra.)

Mo te sciacco a mmalora.

D.P. ⁠⁠⁠V’arraggiate?

Donca site cchiù ntontaro de chillo

Pacchesicco sciaddeo de la fegura,

E fforma de cappiello. Io so dottore

Utroque jure. Saccio la rettoreca...

D.A. E battenne!

D.P. ⁠La storia, la grammateca... D.A. Statte zitto!

D.P. ⁠⁠La fiseca, la nauteca,

L’astronommia, la medecina, la…

D.A. Trasetenne, o mmo votto

La porta nterra.

D.P. Ciuccio-bestia ut oclo.

SCENA SETTEMA.

D. Aniello sulo.

   Mannà li vische suoie!
A parlà sempe, e a no ssentire maie?
Mme deceva lo masto, ch’Arestotele
Era no chiacchiarone;
E tte caccia sse sciorte de scolare.
Iammo a pparlare a ll’autro;
Non fosse tanto pazzo, e mme facesse
Mettere nquarche siesto sso niozio.
Tuppe tuppe; nce stesse Don Mamozio?

SCENA OTTAVA.

D. Mamozio e Dditto.

D.M. Oh Don Aniello, che v’accorre?

D.A. ⁠Io songo

Venuto ccà p’avere no consiglio.

(Buono! Ss’ammico fa parlà la ggente.)

D.M. Scusate, mio signore; avite a ddicere:

Mme pare schitto d’essere venuto.

E non già so benuto, pocca è dubbio.

D.A. Mme pare? Io so benuto ncarne, ed ossa.

D.M. Che conseguenzia è cchesta?

D.A. ⁠E nè lo vero.

Ch’io sò benuto, e buie chiacchiariate?

D.M. Mme pare de vederve, e de sentirve,

E mme pare ch’io stia chiacchiarianno;

Ma lo ddico pe ccerto?

D.A. Fosse certo accossì no ternicciullo.

Lassammo sti mme pare, e no mme pare,

E ppailammo d’affare.

Vorria nzorarme.

D.M. ⁠Non ne ssaccio niente.

D.A. E pperzò ve lo ddico.

D.M. ⁠Pò soccedere.

D.A. La zita è giovenella, e bella assaie.

D.M. Chessa cosa non è ntra le mpossibbele.

D.A. Faccio bene a sposarla, o faccio male?

D.M. L’uno, o l’autro; a Barrata de cecato.

D.A. (Bella museca nova!) Io v’addimmanno,

Si faccio bene, o male a la sposare.

D.M. La renneta de Massa

È ccomme quaglia passa.

D.A. Lo patre nce acconsente.

D.M. ⁠Me consolo.

D.A. Ma si fusseve a mme, vuie che farrisseve?

D.M. E cchi lo sape?

D.A. ⁠Che mme consigliate?

D.M. Chello che ve garbizza.

D.A. ⁠Io crepo, e sbotto.

D.M. Me ne lavo le mmane.

D.A. (Vattennolo) ⁠Ed io v’acconcio

Pe le ffeste, filoseco mmardato.

D.M. Ah! Ah! Vuie site pazzo

Da lo spetale asciuto?

D.A. Io no ssaccio si v’aggio, o no, vattuto.

D.M. Ve faccio na quarera cremmenale.

D.A. Me consolo.

D.M. ⁠Mm’avite fatto nfacce

No vruognolo mmarditto.

D.A. ⁠E cchi lo ssape?

D.M. Iarraggio, parlarraggio, e be farraggio….

D.A. Me ne llavo le mmane.

D.M. ⁠Ve farraggio…

D.A. Chello, che ve garbizza.

D.M. ⁠Ve farraggio

Mparare la crianza. V’è piaciuto

Ncopp’a le spalle meie la mazza auzare?

D.A.La mazza auzà? Mme pare, e no mme pare.

SCENA NONA.

D. Aniello sulo.

   Che mmalora! Sso ciuccio dubbetava
Porzì si mme pparlava, o non parlava.
E rresto sempe a ccoppa.
Addò sbatto de capo,
Pe ssapere si m’aggio da nzorare?
Paro no pollecino int’a la stoppa.
Iusto iusto mo assommano doie zincare:
Fosse pe mme fortura,
De farme annevenare la ventura?

SCENA DECEMA.

Mariaccia, Talanella, e Dditto.

M. Lo treppete, e lo spito.

T. Bona ggente, sta ccà la zincarella.

D.A. Venite ccà: sapite nnevenare

La ventura a cciammiello?

M. ⁠Sissignore.

T. Ma comme! Vasta schitto che nce auzate

Ll’uocchie nfacce.

M. ⁠Ma fitte, e ssenza sbatterle.

D.A. Veccole ccà.

M. ⁠La mutria pare bona.

T. Mutria che dice, e cche prommette assaie.

M. Fuorze te sposarraie.

T.⁠ Ma co qua nenna!

M. Allegra, acconcia, cianciosella, e bella.

D .A. Tutto chesto va buono, ma sarraggio

No marito asciortato, o desperato

Da mmesurare no barcone, o puro….

M. No barcone?

D.A. ⁠Gnorsine.

T. ⁠Na fenesta?

D.A. O fenesta, o barcone, astreco, loggia,

La Mmalora de Chiaia, che ve gliotta!

M. Comme site pastuso, bene mio!

D.A. Me nzoro, o non me nzoro?

T. ⁠Quant’è ccaro!

Se nzora, o non se nzora?

D.A.⁠ Eh iatevenne,

Fattucchiare mpechere…..

M. ⁠Comme strilla?

Zito, e non zito mio,

Nuie nce ne iammo sa? Bonnì.

T. ⁠Bonnio.

SCENA UNNECEMA.

D. Aniello sulo.

   Eh squagliate a ddeiavolo!
Me chiantano accossì comm’a no cavolo.
Senza dirmene nè aseno, nè bestia?
Ma chi veco? È la zita: m’annasconno.
Se ne vene parlanno sola sola:
Sentimmo che bò dicere;
E, ssi accorre, la manno a benedicere.

SCENA DUDECESEMA.

D. Chiarina, e Dditto annascuso.

D. C. Io passarria pe ppazza de catena,

Si pe ggenio sposasse Don Aniello:

Ma quanno sposo li denare suoie,

Faccio no buon’ accatteto.

E ppo, spero che crepa quanto primmo,

E mme levo sso lotano da cuollo.

Quant’ato pò campa? seie, sette mise?

Tanno addevento vedola,

E cco chille felusse, che mme resta

Ne voglio fare festa! E cche guaglione

Pe ssecunno marito…. Oh! Don Aniello,

Vuie state ccà? Mo proprio ntra me stessa

Io parlava de vuie, corame commene

A na zita che tanto ve vo bene.

D.A. Dormo a quatto coscine;

Saccio lo core vuosto.

D.C.⁠ E mine rennite

Iostizia, ca la mmereto.

D.A.⁠ (Oh che facce!)

D.C. Io ve lasso, ca vaco a bisetare

Reto a sto vico ccà quatto commare.

SCENA DECEMATERZA.

D. Aniello sulo.

   Lo tiempo non bò tiempo.
Primmo ch’assomma ssa tropea d’Agusto,
Voglio piglià palazzo.
Me ne vao pazzo pazzo a ffà capace
Lo quonnam suocro mio Don Beneditto,
De sciogliere ss’affare….
Oh canchero! mme pare
Ca mo scenne le scale. Anemo, e ccore.
Penzo a la pace mia, non già a l’ammore.

SCENA DECEMAQUARTA.

D. Benedillo, e Dditto.

D.B. Oh Don Aniello, iennero futuro,

E cche annure so chiste?

D.A. ⁠È mmio l’annore.

D.B. V’aggio ntiso. Venite ccà pe stregnere

Lo matremmonio?

D.A.⁠ Vengo…

D.B.⁠ Pe st’affare,

Si vuie contate l’ore,

Io conto li minute.

D.A. Io vengo a ddicere….

D.B. Saccio tutto: So lleste già li musece

Pe la festa.

D.A.⁠ Va bene (anze va male)

Ma…

D.B. Gnorsì, già parlaie

Co lo notaro, e iodece-a-ccontratte

Pe stenne li capitole, e ssò fatte.

D.A. V'aggio a pparlare d’autro.

D.B. ⁠Favorite

Ncopp’a la casa, e llà parlammo.

D.A.⁠ È mmeglio

Parlà ccà mmiezo.

D.B.⁠ Che v’accorre? Veccome.

D.A. L’ommo sole proponere

E lo Cielo desponere. Co mmico

Che songo attempatiello

Saria nfelice la fegliola vosta.

D.B. Scusateme: Chiarina

V’ha visto, ed è ccontenta.

D.A. È bontà soia; non sape, poverella,

Lo carattere mio ccossì fratuso.

D.B. ⁠Chella è na gioia, che s’adatta a tutto.

D.A. Stutammo sto locigno. Io ve consiglio

Pe bene suio (zoè pe bene mio)

De non darmela.

D.B. ⁠E mmanco io galantommo

A la parola data?

D.A.⁠ Io ve ne dongo

Tutte le ffacortà.

D.B. ⁠La sposarrite

A despietto de l’ate pretenniente.

D.A. (Comm’è ccocciuso.)

D.B. ⁠Si mo ccà venesse

No prencepe a ccercarla, io le derria:

Don Aniello è lo zito, e ttanto avasta.

D.A. Io me veco confuso

Pe ttanta stimma, ed ammecizia vosta;

Ma non boglio nzorarme.

D.B. ⁠E la raggione?

D.A.⁠Non ha raggione Ammore,

⁠E ssi raggione ntenne,

⁠Ammore cchiù non è.

D.B. Quanno po Metastasio muorto e buono

M’è benuto a zucà co ssa sentenzia,

Ve dico ch’io non piglio

No galantommo co la funa ncanna,

Pe ffarlo nguadià. Voglio refrettere

Zo che s’ave da fà. Mo saglio ncoppa,

Chiammo consiglio-de-famiglia, e ssubbeto

Co ccommune piacere

Ve farraggio lo quateno sapere.

SCENA DECEMAQUINTA.

D. Aniello sulo.

   Si me porto sta poglia,
La faccio a buon mercato.
Che beneditto sia Don Beneditto,
Che s’è ffatto capace de scassare
Chisse vere capitole de Zeza…
Zitto, zì! Se ne vene mo lo figlio;
Fuorze mme porta la resposta, e ghiusto
Ccà de facce me trova.
Pare l'auciello de la bona nova.

SCENA DECEMASESTA.

D. Peppino co doie spate ramano e Dditto.

D.P. Oh! signor Don Aniello,

Io ve so schiavottiello.

D.A. Chest’è livrea de no criato vuosto.

D.P. Papà m’ha ditto, ed io me so nchiatrato,

Ca vuie, penzanno meglio,

Non bolite cchiù a ssorema.

D.A. ⁠ È lo vero:

Ma co ppena la lasso.

D.P. ⁠No nc’è mmale:

Sò ccose, che soccedeno a lo munno.

D.A. Io proprio ne sto affritto.

D.P. Chest’è nniente è ttutt’uno.

D.A. ⁠Io v’assecuro….

D.P. (Presentanno doie spate a D. Aniello.)

Aggiate la bontà, Si Don Aniello,

De scegliere na spata a ggenio vuosto

Ntra ste doie. Favorite.

D.A. A qua proposeto?

D.P. Vuie mme nzegnate, mo nce vo, qua masto,

Ca non bolenno cchiù sposare a ssorema.

Nce avite dato no schiaffone.

D.A.⁠E ccomme?

D.P. Quarch’ato frate avria

Mannata na notifeca, e pparlato

Co ppagliette, e scrivane: io non song’ommo

De fracasse, nè baco co lo tristo.

Ve dico, ma co tutta la crianra,

De sperciarce la panza

Co st’allicca-sapune.

D.A. ⁠Oh vì che mmito?

D.P. Levammo le ppazzie,

Non perdimmo cchiù tiempo.

D.A.⁠ Ammico mio,

Sta panza vo porpette, e mmaccarune,

Non allicca-sapune.

D.P.⁠ Si volite,

Io derria de spicciarce.

D.A. ⁠Si credite,

Io derria non penzarce.

D.P. ⁠Io tengo affare,

Non pozzo perde tiempo.

D.A.⁠ E ghiatevenne.

D.P. Si non facimmo primmo

Lo doviello.

D.A.⁠ Doviello?

D.P. ⁠E ggià, se ntenne.

D.A. Gnamamma è mmorta, e non pò fà cchiù figlie.

D.P. (Vattennolo co la spata)

Quann’è cchesto, scusate, s’io ve dongo

Doie chiattonate comm’i fo.

D.A.⁠ Va chiano.

D.P. E na pena pe mme dovere a fforza

A no viecchio nzegnà lo Galateo.

Vuie cercasteve sorema: de botta

Non la volite cchiù: vengo a mmitarve

A no doviello, e scemiate… E ccomme

Mme potite dà tuorto, s’io ve vatto,

Vuie che de ste materie state ntiso,

E ppotite stamparne?

D.A. ⁠(Vi che mpìso?)

D.P. Via mo; non ve facite cchiù pregare.

D.A. E mmo tornammo a ccoppa?

D.P. ⁠Ammico caro,

Io no ntenno obbrecarve; ntenno schitto

Ca sposate, o facite lo doviello.

D.A. Io non pozzo servirve nè pe l’uno,

Nè pe l’ato commanno.

D.P. ⁠Ve ncocciate?

D.A. Me ncoccio.

D.P. (vattennolo) Perdonate, s’io ve repreco

Chella recetta de le cchiattonate.

D.A. Va chià! Mmalora cioncalo!

D.P. ⁠Io m’affriggo,

Dovennove trattà de sta manera;

Ma si vuie non facite

Lo doviello, o sposate

Io ve secoto a ddare chiattonate;

E spero co ste botte.....

D.A. Quann’è cchesto, mo sposo, e bona notte.

D.P. Eh dateme no vaso a ppezzechille,

Ammicone de st’arma! Io me consolo

Vedennove capace de raggione.

Co le belle parole ntra de nuie

Avimmo sistemato st’affaruccio.

Vuie, Don Aniello mio, iate pe mmille.

Via mo; n’ato vasillo a ppezzechille.

SCENA URTEMA.

D. Beneditto, D. Ciommo, D. Chiarina, D. Mamozio, D. Pancrazio, e dditte.

D.P. Papà, bone notizie: Don Aniello

È aggarbato, e ppolito; e da se stisso

S’è puosto a la raggione, e bò sposare.

D.C. Io, comm’ammico, faccio lo compare

A ste nozzole.

D.C. ⁠ O zito bello mio,

Non penzà: ccà stongh’io,

Pe pportarte spassanno.

D.M. Mio signor Don Alesio,

Mme pare, e no mme pare

Doverne consolare

De chisso matremmonio.

D.P.⁠Statte zitto,

Don Mamozio! Che canchero ne vutte?

Aie da ddì, lo futuro sposalizio,

Pocca Donna Chiarina, e Don Alesio

Songo future spuse.

D.B.⁠Chiste songo

Li vere matremmonie fatte a ggenio,

Senza mette pe mmiezo li pagliette…..

Don Aniè vuie parite

Na statola de ligno? Non rerite,

Nè na meza parola nce decite ?

D.A. No dico no grà mutto

De no poveta che resciata ancora.

» Quant' è ciuccio chi se nzora,

E cchi penza a sse nzorà!

scompeltura.

NAPOLE 1835.