'N Paraviso
’n Paraviso
FERD. RUSSO
’n Paraviso
NAPOLI
Luigi Pierro, editore
1892
Proprietà letteraria riservata.
Tip. Edit. F. Bideri, Costantinopoli, 89 — NAPOLI
a Vittorio Pica
’O RICEVIMENTO.
Nce so’ ghiuto int’ ’o pallone.
e perciò ve saccio a ddì
tutto chello ca vedette,
e v’’o ppozzo fa capì.
Me mettette int’ ’a canesta
mmiezo ’a folla che gguardava;
quaccheduno cumpateva,
quaccheduno se spassava,
E nce fuie cchiù de n’amico
che dicette: Ferdinà,
saglietenne allegramente!
jammo, nun t’appaurà!
Io tenevo ’a faccia janca,
v’’o ccunfesso, sissignore,
v’’o ddic’una vota e bbona;
ma nun era pe ttimore.
Me credevo ’avé paura,
ma, guardanno ’o Capitane,
alluccaie: — Saglimmoncenne!
stammo ’a mo fino a dimane!
Belli ccose! Nun v’’e ddico,
pecché nun se ponno dì!
Pe nn’avè n’infanzia bbona
jate, si nce vulit’ì!
Basta, jette. E cammenanno
mme ncuntraie c’’o Pat’Eterno
che dicette: — Torna ’nterra
ca si no vaie all’Inferno!
Nun fa tanto ’o capuzziello,
pecchè, ’ossà! povero a tte!
— Io nun faccio - rispunnette -
niente ’e male, Pat’Etè!
— E chi sî? — So’ Tale ’e Tale…
— E che fai? — So’ nu scrittore…
— Ferdinando arreto ’a Posta?
Te conosco, sissignore!
Si nu bbello mbriacone,
se nun sbaglio, Ferdinà!
Tu fai dinto ’a capa e morta
e po’ curre a ppredecà!
— Pat’Etè, state in errore,
chillo, chillo è n’animale!
Io so’ Fferdinando Russo,
’o puvete dialettale...
— Uh, mannaggia ’o dialetto!
Pure cca me vuò zucà?
nun t’abbasta ’a gente e vascio.
Va dicenno: Che bbuò fa?
Vuo parlà d’’o paraviso?
Va dicenno: che buò di’?
Io te saccio bbuono piro…
Comme, nun te ne vuò ì’?
— Ma guardate, ma sentite,
russo russo io rispunnette,
quann’è abbascio, si nne parlo,
io nne parlo cu rispette…
’O Signore me guardava.
— Piccerì, tu si ttenace!
Vi che bella faccia ’e cuorno!
Piccerì, tu me piace!
’Npertinente comm’a chisto
mai nisciuno è capitato!
Io so sempe ’o stesso viecchio,
ma lu munno s’è cagnato!
E redeva chiano chiano,
bbuono bbuono, ’o vicchiariello;
e allisciannose ’o barbone,
— Iammo, miettete ’o cappiello,
me dicette. — Si vvenuto?
Quacche ccosa ’o bbuò’ vedè?
E va bbene, iammoncenne,
viene sempe appriesso a mme.
II.
’O GUARDAPORTA
Io trasette pe na porta
de cristallo affaccettato
e vutanno ll’uocchie attuorno,
nce restai comm’a ncantato.
Che llustrore! Che grannezze!
Quanta ggente! Quanta cose!
Ncoppa, sotta, a dritta, a manca,
ggiglie d’oro e fronn’’e rose.
Tuorno tuorno ’o casamento,
’e culonne tutte d’oro;
’e ffeneste mbrillantate…
Che scicchezze e che llavoro.
— Chesta é ’a casa ’e tutt’’e Sante;
passa nnanza, cumpariè;
ccà nun voglio ca te firme,
viene sempe appriesse a mme!
’A vutata ’e na culonna
veco a uno cu na chiave.
— È San Pietro? — È nduvinato,
’O talento ’o tiene, brave!
’O chiammaie: — Piè, vide a chisto
— Pat’Etè, nun so cecato…
— Puortammillo passianno
ca chist’è nu letterato.
Io sto stracquo e me ne vaco
pe me fa mez’ora ’e suonno…
Nun fiscà c’’o portavoce,
pecchè dormo e nun risponno!
— Portavoce? dicett’io;
E ’o telefono, San Piè?
— Nuie ccà stammo ancora arreto,
figlio, che nne vuò sapé!
Nuie mancammo ’e tanta cose!
Nuie marciammo all’uso antico.
Manco ’o ggasse è miso ancora…
Siente e vide che te dico!
’Ncunfidenzia, si nun fosse
pe sti quatto stelletelle,
uno ccà starria suggetto
d’appicciarse ’e llucernelle.
Quanta vote ll’aggio ditto:
“Chisto è ssécolo ’e prugresso!
Si facessemo quaccosa?„
Nonzignore! Sempe ’o stesso!
Sempe ll’angele cu ’e scelle
senza cuorpo e senza niente;
sempe ’e nnuvole, e stu ncienzo
ca nce dà chisti fumiente!
Àggio fatto nu pruggetto
pe nu muorzo ’e gallaria…
Manco tanto aggio spuntato!
stammo arreto, gioia mia!
Penzaie pure a nu tiatro
pe nce fa cantà a Gayarre,
niente niente! Cose ’e pazze!
Po’ se dice c’uno sgarre!
Ogne ghiuorno, core mio,
po’ aggia fa nu tiritosto
cu sta ggente ca m’arriva…
Che? Nun è nu bello posto?
Purtinaro! ’E ditto niente!
Embè ’o ccride? ’O manto russo,
chesta chiava dint’’e scianche
e sta bbarba sott’’o musso.
Niente! Manco na livrera!
Ma ched’è, faceva nguacchio
si me deve ’o pumo ’attone
c ’o cappiello c’’o pennacchio?
Che te pare? Aggio raggione?
Siente appriesso: lucre, niente!
Ccà nun pàvano campagna
ccà so’ tutte strapezziente!
È na vita, core mio,
ca te dico, n’ato santo,
primma ’e farla pure n’ora,
se ne iesse a fa bbriganto!
Trase a chisto, caccia a chillo,
’mparuléate cu chill’ato,
chiamma ’appello ogne mmatina…
Io, te ggiuro, sto mmalato!
Quant’ ’e ccara ’a vista ’e ll’uocchie,
sto mmalato! È nu murì!
E pe gghionta, Isso s’addorme,
e aggia fa tuttecos’ì!
III.
SANT’ANTONIO
Accussì chiacchiarianno
nuie ggiravamo p’’o cielo.
— Tutto chesto ca te dico
sta sicuro ch’è Vvangelo!
Viene ’a ccà, scinne sti ggrade,
jammoncenne int’’o ciardino;
nce assettammo, stammo ’o ffrisco…
vuò nu bicchieriello ’e vino?
Va dicenno, te piacesse
Chiù na presa ’e marsaletta?
Nfaccia a chesto stammo bbuone,
tanta rrobba cca se jetta!
Io c’acalo sempe ’a capa
nnanza ’a rrobba pe mmagnà,
rispunnette : — ’A marennella
me garbizza, santo Pà !
— Bravo! E assèttate nu poco,
ch’io mo torno, saglio e scengo;
chesta è ccosa ’e tre minute,
corro ncoppa, vaco e vengo !
E me rummanette sulo
mmiezo ’e frasche, sott’’e mmura.
Io ntramente me guardavo
’a bellezza d’ ’a verdura,
sento, arreto a ccierti ffrasche,
quatto passe nnanza a mme,
nu remmore. M’avutaie
chiano chiano pe vvedè.
Nu purciello chiatto chiatto,
mbruscenannose veneva,
e cchiù appriesso nu rumito
s’’o guardava e s’’a redeva.
Era ’o puorco ’e chillo santo
che si chiamma sant’ Antonio,
che ffacette magnà a mmorse
’e ddenocchie do demmonio.
Me susette, e co cappiello
lle ffacette nu saluto,
’O rumito me guardava:
— da che pparte sì vvenuto?
Comm’è fatto stu penziero ?
figlio mio, va tornatenne…
Trova a n’angelo e dincello,
te mprestasse quatto penne…
— San’Antò, ma i’ so’ venuto
pe vedè, no pe rrestà…
Quanno moro, arrassosìa
me vedite ’e riturnà…
— E sperammo ca stu juorno
fosse propeto luntano!
Nuie ccà ncoppa nce seccammo
de restà cu ’e mmane mmano!
Nun può credere che vvita!
È na vera scucciatura!
stevo meglio int’ ’o deserto,
senza tanto ’e seccatura!
Già, pe me purtà stu puorco,
Aggio fatto na bbattaglia!
Animale nun ne vonno!
Se cunzuma troppa paglia!
Chillo, già, fuie Santo Rocco
ca pecchè nun tene ’o cane,
jette a dicere ’o Signore
ca tuccasse cu li mmane
ll’ingiustizia ca nce steva:
pecchè ’o puorco e ’o cane no?
Pecchè ’o puorco nun arraggia!
Ma si arraggia ’o cane, po?
Nun è cchesto?
Io tengo sempe
na peròccola astipata,
Quanno Pietro cumparette
a purtarme la mmasciata,
me magnaie ’e maccarune,
e, currenno sempe nnante,
arrivato addu San Rocco,
senza dì comme né qquante,
avutaie cu 'e quatto dete
’o palillo ’a parta ’o ggruosso
e che bbuò, tetillo mio,
lle rumpette cchiù de n’uosso.
Cu st’ausanza sulamente
ccà te portano rispetto;
cca nce sta, te l’assicuro,
da crepà na vena mpietto!
Si sapisse ’e fattarielle
che succedono! ’E mmazzate!
Comme va ca Santo Pietro
nun ancora t’’a cuntate?
— Chillo nun ha ’vuto tiempo,
ma si torna, ll'aggia dì
ca cantasse quacche cosa…
— Mo, si aspiette, accummenc ì!
IV.
’E FATTARIELLE
S’assettaie vicino ’o puorco,
e già steva accummencianno,
quann’arriva ’o Guardaporte
cu na cosa int’a nu panno.
— Vino, pane, ’a fellatella,
tutta rrobba pe mmagnà…
E vedenno a lu Rumito:
— Guè, Toto, tu staie ccà?
— Sto cuntanno a stu signore
quacche fatto d’’o paese…
Viene, assèttate tu pure,
jammoncenne! A grand’imprese!
E accussì, na vota ognuno,
ntra na fella ’e supressata
e nu muroso ’e pane frisco,
ntra nu surso e na resata,
me cuntàino tuttecosa.
V.
SAN CRISPINO
― San Crispino, fa, ’o scarparo,
è nu piesso ’artigliaria
ca nun c’è chille sta a pparo!
Ogne juorno fa na storia
mo’ pe cchesto e mo’ pe chello;
ogne juorno aferra ’a suglia,
’o bbisecolo, ’o martiello…
Na matina ’o Pat’Eterno
le mannaie p’’e ffa accuncià,
na pareglia ’e meze cape,
Corre n’angiulo e lle ffa:
— San Crispì, dice ’o Signore,
ca lle miette ’e mmeze sòle.
Fa na cosa acconcia acconcia…
— Ma che ssongo, sti pparole?
Sai ca parle cu n’artista
e nun già cu nu schiappino?
Ma comm’’è! Te si’ scurdato
ca me chiammo San Crispino?
Posa ’e scarpe e va vattenne
pecchè ’o riesto nce penz’io!
— No, serveva pe te dicere
ca sti scarpe songo ’e Ddio…
— N’ata vota mo’! Vattenne,
ca t’avvìo na forma appriesso!
Siano ’e scarpe ’e chi se sìa,
ca pe me so’ tutt’’o stesso!
E afferrammo, lu martiello
se mettette a ffaticà
jastemmanno: — Iammo nnanza!
Iammo bbello!… Ttà-ttà-ttà!
Doppo n’ora ll’angiulillo
torna tutto appaurato.
– Viene ’a ccà, pòrtale ’e scarpe!
Tanto ’e pressa t’ha mmannato?
E dincello: – " Vò tre llire!
Ve l’ha fatte tutte nove!
Nce ha mettute ’e guardiuncielle,
’e ppuntette, tacche e chiuove! "
L’angiulillo, aisanno vuolo,
va addu Ddio. – Quanto nne vò?
– Tre llirette… – Ma ch’è pazzo?
– Che nne saccio, neh Signò?
– Lassa sta, mo’ nce vach’io…
E scennette. – San Crispì!
– Cumannate. – Tu ch’’e fatto!
Sti tre llire ’e vvuò accussi?
– Accussì?
Va, jatevenne!..
Vì che capa gruliosa!…
O pavate, o n’ata vota
mo’ ve scoso tuttecosa.
VI.
’E SFUGLIATELLE
N’ata vota, – ’nparaviso
era ’o tiempo de li rrose
e nce nn’erano a mmigliara,
nerispaielle e addurose, –
succedette nu revuoto
dinto all’ora d’’a cuntrora,
e san Pietro che durmeva
se susette e ascette fora.
Fora, ’o ffrisco ’e nu limone,
san Francisco se sbrucava,
ca vuleva fa capace
a San Ciro c’alluccava.
– Tu che vvuò? Songo d’’e ttoie?
Ma guardate c’ata cosa?
Mo’ a nu santo n’è ppermesso
cchiù de cògliere na rosa!
San Francisco rispunneva:
– Ciro mio, te sto preganno…
Songo ’o santo ’e tutt’’e sciure
e sti ccose tutt’’e ssanno!
Posa ’a rosa, t’aggio ditto,
e sarrà meglio pe tte!
– Ma sta scritto a quacche pparte?
– Accussì piace a me!
– Ma guardate! Se fa forte
pecchè è frato a Ggiesù Cristo!
– Mo te sono na carocchia!
– Tu si ’o primmo cammorristo!
Pe sti strille, pe st’allucche,
Santo Pietro se scetaie.
– Che mmalora! St’ammuina
a chest'ora! E quanno maie?
Pace, pace, amice mieje!
Sante e sante nun sta bbene!
Site surde? E datevelle,
ccà nisciuno ve mantene!
E vutanno ’e spalle, steva
quase pe se nne turnà,
quanno Ddio, da copp’’a loggia
s’appennette p’’o chiammà.
― Guardapò! di’ a chisti duie
ca è ccuntrora e nun s’allucca!
Mo’ aggio avuto na canesta,
m’ha mannata ’a Croce ’e Lucca!
Songo cierti sfugliatelle...
Quann’è ogge ch’’e spartimmo,
di’ a sti guappe, ’a parta mia,
ca ccà guappe ’un ne vulimmo!
VII.
’O CHIANCHIERE
Na dummeneca d’agusto
era nfaccia a vintun’ore,
nu chianchiere ch'era muorto
jette ncielo add' 'o Signore,
Fore ’e mmure ’o paraviso,
cu nu sole ca scuttava,
steva quase nu migliaro
tutto ’e ggente c’aspettava.
Chi, assettato, ’e fatte ’e casa
se cantava nnanza ’e pporte,
nu guaglione mbraccio ’a mamma
picciava forte forte,
e nu monaco cercante
smiccïava a na nennella
ca cu n’aco arrepezzava
nu pertuso a la vunnella.
Nu pessente ’e san Gennaro
se chiagneva ’a tabbacchera
ca lassaie sott’’o cuscino
zeppa zeppa, chella sera;
nu cecato sulo sulo
se fumava nu mezzone,
appuiato, capa e mmane,
ncopp’’o pumo d’’o bbastone,
e na chiorma ’e sartulelle,
cu ’e frangette e ’e vveste corte,
se cuntàvano redenno,
comme va ch’erano morte.
A la vista de san Pietro
c’affacciato ’o spurtellino
se metteva a chiammà ’appello
cu san Paolo vicino,
tuttuquante, zitto zitto,
s’agghiustàieno a ffilere,
comm'a nnanza ’o capitano
’e surdate int’’o quartiere.
— Bbona ggè, tenite a mmente!
Chi nun dice ’a verità,
quant’’è ccerta chesta chiave,
de trasì s’’o ppò scurdà!
E accussì dicennno, ’o Santo
guardaporte, se pigliaie
da san Paolo ’o riggistro,
e ll’appello accumminciaie.
— Peppenella ’a nzalatara!
— Eccuccà! Songo prisente!
— Fatte nnanza. ’Onna Rusina,
’a mugliera d’’o sargente!
— So’ pprisente! — rispunneva
n’ata voce e doppo n’ata.
— Don Alfredo Scognamillo,
’o marito ’a Pezzecata!
So’ ppresente!
A ppoco a ppoco
se passaie ’o centenaro.
Nce trasette na mudista,
’o cecato, nu craparo,
’o guaglione che chiagneva,
na capera, nu fuchista,
’a famiglia ’e n’ugliararo,
nu scrivano e nu marmista.
’O chianchiere, che pareva
nu tantillo malandrino,
cu ’e ddoje mane annascunnute
sotta sott’’o mantesino,
ogne ttanto aizava ’a capa,
aspettannose ’a chiammata,
e guardànnose a san Pietro
cu na mossa ammartenata.
E sentenno finalmente
doppo n’ato paro d’ore
da san Pietro ’o nomme suio:
— Nu chianchiere! Salvatore!
chiano chiano s’accustaie,
mazzecanno: — Èccome cca!
Tanto tiempo nce vuleva!
So’ ppresente, Santità!
— Ma che rrùseche nucelle?
ma ched’è, faie ’o bbruttone?
Leva ’e mmane ’a lloco ssotto,
scrianzato lazzarone!
Basta, va: chi t’ha mannato?
— E pecchè chest’addimanna?
Tuttuquante so’ ttrasute
e a me sulo, chi me manna?
So’ vvenuto ca me spetta
quant’è ccerto ’o mese ’Austo!
Va te nforma! Io ncopp’’o munno
aggio dato ’o piso justo!
Tu chi sì, famme capace?
Fusse cchiù ’e nu guardaporta?
Te sì mmiso c’’o cumanno,
ma cu mme, fai palla corta!
Che m’assigne, a parlà sparo
’a dereto ’o fenestiello?
Te vulesse int’’a zumpata,
pietto a pietto, c’’o curtiello!
Scinne abbascio!
A santo Pietro
lle sbatteva 'o core mpietto,
ma pensaie: si mo’ nun scengo
ccà me pérdeno ’e rispetto!
E nzerranno 'o fenestiello,
cu dduie zumpe aprette 'a mosta:
ma vedenno mmano a chillo
na curtella 'e chesta posta,
pigliaie tale fuiarella
ca starrà fuienno ancora!
’O chianchiere'o secutava,
e accussi pe cchiù de n'ora.
Chesto mo’, venimmoncenne,
jette ’a recchia ’o Pat’ Eterno,
ca parlava cu san Marco
assettato a nu pepierno.
Ditto nfatto cumannaie
ca san Marco fosse juto
fora ’e mmura addu san Pietro
pe vedè de darle ajuto.
Ma san Marco appaurato
rispunnette: Comm’’e ditto?
Che nce stongo sultant’io?
Manna a Ciro, a Beneditto,
a Pascale Baylonne,
a san Giorgio, a sant’Antuono…
Iusto a mme te sì ddiretto?
Pat’ Etè, quanto si’ bbuono!
Tu sta vota nun me cuoglie!
T’’e scurdata ’a storia vecchia?
Io po vaco, faccio ’o guappo
e nce perdo n’ata recchia!
VIII.
’O SVENIMENTO
Na signora mmaretata,
era ’e sabbato, arrivaie.
— Tuppe-ttu… — Signò, trasite…
Guè chell’era bbona assaie!
Cierte bbracce! ’E ttrezze nere,
ll’ uocchie tante… Nu bisciù!
Ma che ppietto! Che gghiancore!
Io nun ne putevo cchiù!
— Favorite, bella mia…
— Ho ll’onore di parlare
a san Pietro?.. — Onore è mio,
mi potete comandare.
— Eccuccà… Nc’è mio marito
impiegato d’’a dogana…
Si ’o poteste fare entrare…
— ’A cuscienzia ’a tene sana?
— Eccuccà, qualche peccato
tuttuquante l’hanno fatto…
Lui vedete, veramente,
nun falsificò ’o cuntratto…
Chillo mpiso d’’o nutaro
fece tutto. Mio marito
s’è ttruvato cumplicato,
e poi fu ddestituito…
Eccuccà… d’ allora in poi
’a famiglia andò pezzenno…
Lui, cu ’e spalle nfaccia ’o muro
e cu mme sempe chiagnenno,
nun putenno, in certo modo
più lucrarse nu carlino,
pe ddimenticarse ’e guaie,
eccuccà, si diede al vino…
Noi stavamo allora ’e casa
dentro ’o Bburgo di Loreto,
e nce steva ’o prupitario,
don Custanzo de Pineto
che avanza cchiù de n'anno…
Nu carnetta nummer’ uno!
Era propio fatto apposta
pe nun fa bbene a nessuno.
Na mattina, mmezz’ ’e ggrade
s’incuntrò cu mio marito,
e lle fece na scenata
che ’a sentì pure don Vito,
quello ch’era a pporta a nnoi,
moldo inteso int’ ’o quartiere…
Voi capite… un gentilomo,
nun puteva prevedere
che nu mascalzone tale
lle facesse quella parte!
Mio marito nun è sciocco…
Lle voldarono li quarte
e afferrato a don Custanzo,
comm’io mo afferrasse a vvuie,
’o ruciuliò p’’e scale,
e murì, salute a nnuie!
Figurateve ’o spavento!
Arrestato a ffresco a ffresco,
ora mo, stu mio marito
fu portato a san Francesco…
E così, San Pietro mio,
se rovinano ’e ffamiglie!
Eccuccà!… Io restò, ppoi,
mmezz’ ’a strada assieme ’e figlie…
Quatto chiode ’e Ggiesù Cristo,
tuttuquante ’e poca aità…
Pe ddà pane a ttanta vocche,
comme, neh, dovevo fa?
⁂
Io, sentenno, m’’a guardavo.
Guè, chell’era proprio bella!
Nu buccone ’e cardinale;
Nu bburriello ’e mozzarella!
E te dico chiaro e tunno,
ca, si dipendeva 'a me,
ll’ avarria già cuntentata,
tu capisce lu pecchè.
Rispunnette: — Sora mia,
io nun pozzo farve niente.
Si se fosse limitato
a sciaccarlo sulamente.
meno male. Ma l’ha ’cciso,
e ntra nuie nun ce po’ sta…
Favorite voi… Ve ggiuro
ca ve faccio cunzulà.
Chella, invece, se fa janca
comm’ ’a carta, dà nu strillo,
stenne ’e ggamme, stenne ’e bbraccie,
e lle vene nu sturzillo !
Te figure tu, stu ppoco ?
Che mmalina avev’ ’a fa ?
Me mettette a chiammà aiuto:
— Gente ggè ! Currite ccà !
— Ch’è succiesso? — ’O svenimento!
Ca lle manca lu rispiro!
Lesto! ’O miedeco!… Currite
e purtateme a san Ciro!
Doppo n’ora Ciro arriva,
chiano chiano, muollo muollo…
Ma vedenno ’o piezzo ’e bburro,
guè! Se nce menaie ncuollo,
e cu ’a scusa ca tastava
pe vvedè che nc’ era 'e bello
chillo faccia ’e galiota
se pigliava ’o passaggiello!
Io tenevo ’o cannelotto…
Stette stette, ma sferraie.
— Quanno ’ossà! te si stancato,
po’ m’ ’o dice e te nne vaie!
— Pecchè forse t’ appartene?
Embè, nun ’o ffaccio cchiù…
— Chisti fatte, Ciro mio,
nun te l’ ’e ’a rusecà tu.
E accussì, nu tira e molla,
na parola port’ ’a n’ata
nnanza ’a femmena svenuta
lle facette ’a paliata.
Isso, zitto, se ne jette
adderitto add’ ’ò Signore.
— Nun sapite : ’O guardaporte
mo' vo’ fa ’o conquistatore!
S’ha purtata int’ 'o casotto
na scardona bbona assaie…
..........
Po’ se dice po’, c’ ’a gente
perde ’e lume ’e passa ’e guaie!
IX.
CUNFIDENZE
A poco a poco tramuntava ’o sole,
stennenno ll'ombre pe ddinto. ’o ciardino:
’o Rumito, ntra ’a risa e li pparole
s’era addurmuto c’ ’o puorco vicino.
San Pietro se metteva ancora vino
cu ’a coscia accavallata a lu denucchio,
e, c’ ’o pietto appuiato ’o tavulino
io me stevo aggarbanno nu fenucchio.
— Ccà se fa ches to d’ ’a matina ’a sera,
diceva, seguitanno ’o Guardaporta
Bellezza mia nun c’è sciorta cchiu nera!
Siente a frateto tuio ch’é meglio ’a morta!
Quanno avimmo tenuto ’a mala sorta,
che nce vuò fa? Se fa comme facc’io…
Io m’ ’a voto a libbretto. Che me mporta!
Me so ’mparato a dì: Lassa fa a Ddio!
Nun te può fa manco na parlatella
cu quacche Ssanta femmena! È peccato!
Ccà se sta comm’a ddinto a na cappella:
li ffemmene ’a nu lato e nuie ’a n’ato.
’E visto maie a nu cane arraggiato?
Vide a me, vide a isso. ’O fatto e chisto.
Quanno sto cchiù d’ ’o ssoleto abbuttato
me ne vaco a sfucà cu Giesù Cristo!
Chillo sì! Chilo è n’ommo cu ’e mustacce!
Te vede, e te fa sempe bboni ccère.
E n’ha passate guaie! Fatto a ppetacce,
mettuto ncroce de tutt’ ’e mmanere!
Embè, si ’o vide, nun te pare overe…
Nu curazzone ca te fa spassà!
Lle può d’ ’o munno dì ’e ccose cchiù nere,
Isso rispotine ch’è ll’Umanità!
Nce stà cchiù ppuorco 'e Giuda Scariota
ca s’’o vennette pe ttrenta denare?
Embè, parlanno ’e chisto, Isso na vota
che mme dice? T’ ’a dongo a nduvinare!
Me dice a mme: — Nun me ce fa penzare
Steva nzellato ’c diebbete! ’O ssacc’i!
’O ffacette pe se nne liberare…
E po’, era scritto… Aveva jì accussì!
’A vita ch’immo fatta nuie allora,
nun ’a facimmo cchiù, t’’assicur’io!
Sulo arapenno ’a vocca, a la bon’ora
te faceva passare ogne vvulìo.
Ma se sape! Chill era ’o figlio ’e Dio!
Miracule allicchette, chilli là!
Se n’è ppersa ’a semmenta, frato mio,
mo’ se sanno sultanto raccuntà!
X.
’O SARTORE
Basta, va.
Passava ’o tiempo
e se n’era sciso ’o sole
ma nun se faceva notte.
Io sentevo li pparole
de san Pietro a una a una,
ma nu poco nfuscatiello,
m’avria fatto cchiù nu suonno
ncopp’a nu matarazziello.
— Ccà pe nnuie nun è mai notte,
bello mio! Nun può durmì,
— me dicette ’o Guardaporta —
Che vuò fa? Te ne vuò jì?
O vuò starte n’ato ppoco?
Dillo! Parla francamente…
— Già… San Piè… me so’ stancato…
— E nu vuò vedè cchiù niente?
Manco quacche amico tuio…
quacche bella figliulella…
Si vuò jì, te mparo ’a via:
saglie chesta muntagnella.
Ncoppa truove tanta strate
e la ggente che passea…
Chella é ’a ggente cchiù bbiata;
nce sta ancora chi pazzéa!
Va, saglimmo, t’accumpagno;
doppo po’ te ne può jì.
Che nne dicite?
E se susette.
Io lle rispunnette: — Sì.
⁂
Llà ncuntraie ntra tanta facce
cierti vvecchie canuscenze;
femmene, uommene, guagliune,
siè-Marie e siè-Vicenze;
cierte prièvete, ’o maestro
ca me dette ’o primmo zero
e ’a famiglia d’’o cumpare
quann’io jette ’o bbattistero.
Ncuntrai pure ’o sarto mio
c’avanzava cierti llire…
Chillo lla me canuscette.
— Neh, vi posso riverire?
— Riverire? Tu che ddice!
Patronissimo, ’onn’Antò!
— Bè, dovrei dirve na cosa…
— Pure ccà? Ma dì, che vuò?
— Vuie po’ chillo conticino…
— Uh, mannaggia chi tè nnato!
Tu sì mmuorto e dura ancora?
Comme! Nun te sì scurdato?
— Niente affatto!… Na sciamissa,
tre custume ’e merinò,
nu stiffelïo e nu fracco…
— Basta, basta, don Antò!
— Comme basta? Ma gli eredi?
— (Guè, ma chisto è nu celizzio!)
statte buono, ca ’o facimmo
n’ata vota, stu servizzio!
XI.
LUVISELLA
Meno male, 'a bbona 'e Ddio,
fuie chiammato e se ne jette,
Io currevo 'a ll ato lato
quando Pietro me dicette:
– Vi che piezzo de guagliona!
Guarda ccà ! Guarda nu poco!
M’avutaie. Ma... – Luvisella!
Me facette comm’’o ffuoco.
— Luvisella!... Ferdinando?
— Sì, bellezza! — E comme va?
— Che piacere che m’’e dato!
— E tu, ch’è! Te truove ccà?
— Fuie Ciccillo!... Chillo mpiso...
Cu na botta sott’’o core...
— Tu che ddice... — Già. Appuraie
ch’io cu tte facevo ’ammore!
— Mo’ che scengo acconc’io
— No, Tetì!... Pe ccarità!
Si tu ancora me vuo bene
chesto tu nun l’’e ’a fa!
— S’io te voglio ancora bene?
Sempe, sempe, gioia mia!
Già, tu ’o ssaie, pe mme sì stata
sempe ’a cimma ’e simpatia!
— Te ricuorde? Che sserate!
Ncopp’’o Vommero c’’a luna!
— Mo’ nce sta ’o Rione nuovo…
— Te ricuorde ’a siè-Furtuna?
— Chella bella cammarella
cu ’a fenesta a mezzuggiorno…
— Te ricuorde ’a primma vota
quann’io me metteva scuorno?
— Che ghiurnate! Che ddelizzie!
Chilli fritte addu Pallino!
— Io ca te vasavo mmocca
quanno tu mettive ’o vino…
Chella vesta ca me diste…
’o cappiello cu ’a nucchhetta!…
— L’anelluccio… — ’E sciucquaglielle…
E ’a canzona d’ ’a Frangetta!…
Te ricuorde? Io t’’a cantava
chiano chiano e tu redive…
Dimme mo’, che ffa di Giacomo?
— C’ha da fa! fa ’ammore e scrive.
— Belli tiempe! Io ccà me secco!
sola, io nun me fido cchiù…
Prega a Ddio ca te chiammasse!
vienetenne pure tu!
— Si me vonno, bella mia!
Cu nu cuofeno ’e peccate…
Si sapisse! ’A parte ’e vascio
Songo ggià scummunicate…
— Tu che ddice, bbene mio!
E san Pietro sape niente?
— (Nun me n’ha parlato ancora,
nun ’o ssape, p’ ’o mumente…
Zitta, zì, parla cchiù zitta!
Ca si no, povero a mme!)
E vutannome a lu Santo:
— Nce ne jammo, neh san Piè?
— Si te pare, bello mio!…
Viene ’a ccà, pe ccà s’accorcia…
Va, salutala… Fa priesto!
Me fai tènere sta torcia!
E avanzanno ’o pede, jeva
murmuranno: — Torcia ’e cera!
Vì che scicco cannelotto!
Guè, so’ tutte ’e na manera!
XII.
'A PARTENZA
Io, redenno, ’o jeva appriesso
e ogne ttanto m'avutava.
Essa, c’’o ventaglio mmano,
ogne ttanto salutava.
— ’A fenisce o no ? Sant'Anna!
Sì nu zimmaro, guagliò!
— Quant’è bbella! io suspirava.
E san Pietro: — Meh, va bbuò!
Basta!… E sienteme: vattenne.
Mo’ te porto add’’o Signore,
T’addenucchie e ppo’ lle dice;
“Ve ringrazio dell’onore.„
Iette. E comm’aveva ditto
santo Pietro, io m’acalaie
nterra, nnanza ’o Pat’Eterno
e accussi ’o ringrazziaie.
Arrivato nfaccio ’a Porta,
veco tanto n’avuciello!
Gruosso quant a nu cavallo
e cu ’e scelle ’e cestariello.
— Saglie ngoppa. Statte bbuono,
e va scrive bboni ccose…
- me dicette santo Pietro,
e che ssiano rispettose!
Nun fa diebbete, va chiano,
e rispetta ’e sacramente…
Fatte sempe ’o fatto tuio,
e n’avè pavura ’e niente!
Chi cammina p’’o dderitto
nun po’ mai ntruppechià!
Chisto è frateto, che parla…
Che te pozzo aggevula?
— Santo Piè, na grazzia voglio...
— Va dicenno, figlio mio…
— ’E denare e ’a bbona sciorta…
— E va bbuò, lassa fa a Ddio!
E strignennome la mana
me dicette: — Afferra ’a bbriglia;
tiene forte e bbuon viaggio,
tant’ossequie ’a famiglia.
Accussì me ne scennette
e arrivai mmieso Pennino,
a cavallo a chillo coso
comm' Astolfo 'o Palatino.
VITTORIO PICA
Arte Aristocratica
Conferenza letta li 3 aprile 1892 nel Circolo Filologico di Napoli
Stampato nel formato quasi perduto di qualche eucologo. Prezzo L. Una
C. D’ADDOSIO
Bestie delinquenti
Con prefazione di Ruggiero Bonghi — Un vol. in 16 con illustrazioni L. 2