'O Cantastorie
Sonetti recitati nel Circolo Filologico di Napoli
domenica 13 gennaio 1895
Nun ve credite, già, ch'è robba nova!
Chesta è na giacchettella arrevutata!
Aggio ditto:—Vedimmo si me giova
na botta, na stirata e na sgrassata!
Quacc'amico m'ha dato na vuttata,
quacc'ato ha ditto:—Fàllo pe na prova;
'a faccia tosta steva appreparata,
na passatella, e mo' se schiude 'a cova!
Uocchie nire, uocchie 'e mare, uocchie cianciuse,
faccelle, ca chi sa che v'aspettate,
primma d'accummincià ve faccio 'e scuse!
Sta rrobba nun s'accatta e nun se venne,
ma si po' arrasso sia, vuie ve' seccate,
susiteve, 'mparanza, e ghiatevenne!
I.
— Ecco Linardo in campo! Il palatino!
’O palatino ’e Francia cchiù pputente!
Teneva nu cavallo, Vigliantino,
ca se magnava pe grammegna ’a gente!
Comme veveva, neh! Na votta ’e vino,
na votta sana, ’un le faceva niente!
Nu surzo sulo, nu varrilo chino!…
E se magnava ’e zzeppole, vullente!
Po’ teneva na spata, Durlindana!
Uh ffiglio ’e Ddio, e che poco ’ammuina!
Se sape! ’A manïava chella mana!
Na notte, pe passà d'’a Francia ’a Spagna,
chisto Linardo neh, che te cumbina?
Caccia sta spata, e taglia na muntagna!
II.
N’ata vota, passanno pe nu campo,
vede ’a luntano na cosa lucente!...
“Neh, che sarrà, fa isso, chisto lampo?
Se trattasse ’e quaccosa malamente?...„
Erano turche! E nun ce steva scampo!
Erano cchiú de mille e cincuciente!
“’A bbona ’e Ddio! fa isso. O moro o campo!
Ccà sta Linardo! Il cavalier possente!„
Stèvano ’e turche tuttuquante armate!
Curazze e scute d’acciaro strafino,
da ll’Amustante ’e Perzia cumannate!
“Hann’’a fa festa!„ Linardo penzaie;
dette na sperunata a Vigliantino,
cacciaie ’a spata, e nnanze se menaie!
III.
“Io ve saluto! Carugnune belle!
lle dicette Linardo, comme state?
Ve voglio fà magnà vrenna e sciuscelle!
Venitevenne, va, gioie d'’o frate!
M’avite fatte troppo ’e farenelle!
Pure sotto, me site capitate!...
Nne voglio fa tammurre, ’e chesti ppelle!
E rotiando il bracci con la spata,
Se mena ’e capa sotto mmiezo a llore
e n’accedette mille, una vutata!...
“Non v’eri alcuni alla corte di Frangi
ca di costui facesse cchiù remmore!
Terribil spati, e più terribil langi! „
IV.
Nu ggiagante ’o tenea pe nu pupazzo!
Nun te rico ’e facchine r'’a Rugana!...
S'’e metteva int'’a pippa pe sullazzo!...
Una fumata, tutt'’a Caravana!
E po’, na forza!... Cose ’e fa ascì pazzo!
Na vota s’appuiaie cu na mana,
pe na cosa, vicino a nu palazzo...
’A casa jette nterra sana sana!
Si sulo te tuccava t’accedeva!
’O terramoto, quanno cammenava!
’A fine ’o munno, quanno cumbatteva!
Sentenno sulo ’e passe, se tremmava!
E che bberive! E comme se fuieva
quann’isso mmiezo ’e gguerre se menava!
V.
Era pure nu poco mariuolo!
Menava ’o rangio, e jeva bello overe!
Che ne vuò fa ’e guagliune ’e copp'’o Muolo!
E tanno t'’o ffaceva ogne gguarriere!
Alla ventura andava sempre solo!
Sulo c'’a spata! Liggiere liggiere!
Guagliù, che bella crema ’e palazzuolo!
Mo’ nun se vere manco c'’o penziere!
Gente, ca pe nn’avè n’infanzia bona,
S’hann'’a verè ’o triate ’e ronna Peppa!...
Jescene pupe, llà!... ’Mprucessiona!...
Vuie ’e ssapite!... Cu ’e ccurazze d’oro
Mènano botte senza fa na zeppa!
Core e curaggio, teh!... Viate a lloro!...
VI.
Tanno l’Italia, ’a Francia, ’a Lumbardia,
stevano ’nguerra cu Cane ’e Maganza,
ch’era overo nu cane ’e massaria,
’o meglio traritore r'’a paranza!
Guardate: pe ccapì ll’irea mia...
Si ll’avesse ncuntrato l’Ambulanza
t'’o purtava adderitto ’a Vecaria
p'’o ferrettà dint'’a cchiù mmeglia stanza
Ma ’o bello sa’ qua’ era?... Carlumagno,
’o mperatore ’e tutte ’e palatine,
ca è stato e sarrà sempe nu papagno,
steva a sentì tutt'’e cunziglie ’e Cane,
ca cu chell’arte ’e giesuvito fine
lle risgustava ’e meglie crestiane!
VII.
— Ma comme! Tuttuquante ’e macanzise
so’ trariture? — È na fatalità!...
Song’ una razza!... — Ma songo francise?...
— Francise? E statte zitto! Siente llà!...
— Guè!... Nun v’appiccecate!... Avite ntise?
Si no... comme me pozzo allicurdà?
Chesta è na storia mmesurata a ppise...
Tuocche ’a valanza.... e m'’a faie abbuccà!
— A bbuoni conte, è na spiecazzione....
Io po’ che v’aggio fatto?... N’addimanna!
Pe ne tenè na mente.... na raggione...
— E siente a me! Chest’è na storia granna;
viene ogne ghiuorno e fànce attenzione!...
Pava ’e ri’ sorde! E allora, po’ cumanna!
VIII.
Basta, p'abbrevià, nu bello juorne
pe lliguardo a stu Cane, 'e palatine
làssano a Carlo mmiezo a li taluorne
e correno pe vuosche e pe mmarine.
E Carlumagno, sbruvignato 'e scuorne,
ammenacciato da li sarracine,
cerca n'aiuto a Cane, e manna attuorne,
e v'assicuro, steva ncopp''e spine!
Ma 'o Macanzese, cuglienno 'o mumento
che Carlo in Frangi sta sulo tremmanno,
scappa, va a cumbinà nu riggimento,
s'aunesce c''o Surdano d''a Turchia,
e marcia su Parigge murmuranno:
— Mo' sta chiuvenno dint''a terra mia!
IX.
Linardo, Astolfo, Orlando e Ricciardetto,
cu Guido e Bradamante se ne vanno
tutte a cavallo. È lucido, l'elmetto...
E p''a strata se vanno allamentanno.
— Nun ce turnammo cchiù!... Pe nu dispietto!
Currimmo a la ventura tutto l'anno!
Che fa?... 'O lassammo sulo, a pietto a pietto
cu Cano! I' che starranno cumbinanno!
Ed Astolfo aggiungea: — Povera Franza!
'A veco e 'a chiagno!... Cu chella mazzamma!..
Che te ne faciarrà, Cano 'e Macanza!...
Ma Orlando tagliaie curto: Io tengo famma!..
Se cammina 'a trent'ore, a tutta ordanza!...
Facitelo pe chella Bella Mamma!...
X.
Magnammo, guvernammo sti cavalle,
e doppo po', parlate 'e chi vulite!...
Mo' m'accattasse na sporta 'e taralle
e 'a sbacantasse mentre vuie chiagnite!...
Dice Linardo: — E addò truvammo 'e stalle?
Addò, na cantenella?... I' comme site
gentile!... Avite fatte 'e ffacce gialle!....
Iammo nnanza!... Ma scuorno ne tenite?
Curaggio!... 'A primma frasca ca truvammo,
scennimmo e nce magnammo na cusetta!
Mò è tiempo 'e cammenà!... Va, cammenammo!
'A strata è chesta, e nun ce stanno viche!...
Stanno ancora 'o pprincipio e nce lagnammo?
Simmo, o nun simmo cavaliere antiche?!...
XI.
Iettene nnanza pe n'ati ttre ore...
Spuntava 'a luna 'a copp'a na muntagna.
Diceva Orlando, spugnato 'e sudore:
— Io nun capisco, ccà, quanno se magna!
St'atu Linardo!... Fa sempe 'o duttore!...
Se vularria lagnà, ma nun se lagna!
Ma che se tratta 'e pèrdere l'annore
si vene 'o desiderio 'e na lasagna?
Si chillo tale, pe quatto lenticchie
venette a 'o frato 'a primma-giuventù,
io pe nu paro 'e solde 'e cannulicchie,
pe na fella 'e timpano o de sartù,
e pe vèverme 'e vino uno o dui sicchie,
me vengo tutto chello che vuò tu!
XII.
Cammìnano, accussì, pàssano ’a notte,
’a notte appriesse, e tutt'’o juorno appriesse!..
Veneca n’ommo cu cierti rricotte;
Orlando ’o chiamma: — Bell’o’! C'’o permesse!
Dimme na cosa... ’e vvinne, sti rricotte?
— Gniernò, signò... Pe mme.... fosse ll’istesse...
Vengo ’a Castiellammare a ossa rotte....
V'’e desse tuttuquante, si putesse....
Ma l’aggia purtà ’o sinneco ’e sta terra,
ca ogge è ’o nomme suio — Comme si chiamma?
— Chisto è ’o buglietto: don Pascale Guerra...
— Guerra? E nun me canusce?... E miette ccà!...
Guerra songh’io!... E tengo pure famma!....
Tenite spicce?...’O voglio rïalà!....
XIII.
’A cumparza ’e chist’ommo beneritto
fuie buono aùrio a chilli cavaliere.
Vutava ’a strata, e propio dint'’o stritto,
pàffete! ’E faccia steva ’o canteniere!
— Chisto, mò è certo, nce ’o fa, nu zuffritto!
dice Orlando, e se ’mmocca cu ’e guarriere.
— Che cumannate?... — Na cosa.... nu fritto,
na zuppa, addò nce azzeca nu bicchiere!...
— Faccio na meza purzione a ttesta?...
— Na meza?... Tu qua’ meza vai cuntanno!
Si rrobba nun ne tiene, ’e fatto festa!...
’E palatine màgnano a ccantàre!
Tu nun te spicce manco pe n’at’anno...
Sti ffamme ccà? cheste so’ famme rare!
XIV.
E se mette a magnà chello che trova,
e se veve acqua, vino e sciacquatura.
P''o canteniere chesta è rrobba nova,
e guarda, stingenato d''a paura!
'O cacciavino piglia trecient'ova,
fa na frettata e 'a porta meza crura...
Strilla Linardo appena mmocca 'a prova:
— Chisto l'ha fatto pe repassatura!...
L'afferra pe na recchia, e 'a miezo 'a strata
tant'auto 'o mena, comme 'o libbro conta,
ca da lu cuorpo ll'anema è scappata!...
Po' trase dinto, e 'a tavula s'assetta:
— Sa' che buò fa, patrò? pe na supponta,
portamella, sta meza lasagnetta!...
XV.
Dinto a nu terzo d’ora hanno magnate
quanto se po’ magnà nu riggimente!
’O canteniere, sempe stralunate,
nun ne capeva propio ’o rieste ’e niente!
— Chiste, penzava, so’ ggente affatate!...
Mamma, e comme faticano cu ’e diente!...
Da quanto tiempo stevano affamate?...
Overo chiste so’ d'’o Cincuciente!...
Io mo’ stevo c'’a capa, ca surtanto
dint’all’Opera ’e pupe, accumpareva
’o palatino ca magnava tanto!...
E quann’Orlando, appena sazziato,
l’addimannaie ’a nota a quanto jeva,
dicette: — Io nun voglio essere pavato!...
XVI.
Mo' nce vo' 'o fatto, m'abbasta l'annore
d'avè servuto 'e Palatine 'e Frangia!...
Dice Linardo: — Ebbravo 'o prufessore!...
Guagliù, chisto se mmèreta na mangia!...
Che lle vulimmo dà?... Nu mperatore
nfilato, vivo vivo, int''a na langia?...
'O vulesseme fa Cuvernatore
de quacche terra?... Embè... uno s'arrangia...
— No, no, dicette Orlando; a chisto lloco
l'annummenammo Rre d''e canteniere!...
Pìgliame nu tezzone 'a dint''o ffuoco...
'O canteniere lle porta 'o tezzone.
Orlando 'o stuta dino a nu bicchiere
e scrive nfaccia 'o muro sta canzone:
XVII.
“Trasite 'a rinto, ca 'o bicchiere è buone,
e 'a cantenera è meglia d''o bbicchiere!
Appicciate nu cippo a Sant'Antuone,
ca 'o fatto, si se conta, nun se crere!
Auto che Pazzariello a cante e a suone!
Ccà tutt''a rrobba, è geniale overe!
'A carnacotta, 'o cèfaro, 'o mazzone...
Chesta è 'a meglia cantina r''o quartiere!
Ma c'hanno fatto? 'A dimustrazzione?
Teh! Guardate che folla nnanzo lloco!
S'è arrevutato tutto 'o Casalone!...
Zitte, ca nce trasite a poco a poco!...
E quanno state nfaccia 'o maccarone,
m'avite 'a fa 'a finezza 'e vasà 'o cuoco!„
- XVIII.
Avite ntiso o no? Erano 'a gente
ca l'avrisse vasate sott''e piere!...
Ll'ebbreca 'e mo? Nun n'è rummaso niente!..
Mo, tuttuquante, songo cavaliere!...
Valle a cuntà!... Cùntale a ciente a ciente,
e arrìvece sultanto c''o penziere!...
Fummo, mpieche, denare... e po', va siente!
Vanno a fernì mmiezo 'e carrubbeniere!
Pigliate 'o fatto r''a Banca Rumana!...
Bastava ca Linardo accumparesse,
ncopp''o cavallo, cu na langia mmana!
Sulo a sentì ll'addore... 'e pesce fritto,
accumminciava a dispenzà cunesse,
e nce 'a tagliava, 'a capa, a stu Giulitto!
- XIX.
“Or Carlo Mano avea sperito un messo,
(se rice, come fosse, nu curriere,)
che cercasse di Cano ampresso ampresso
per colline e foreste e per riviere!
Pe fa capì: Carlo mannaie nu spresso
ca lle truvasse a Cano da Pontiere,
ca il regno se truvava cumprumesso,
ammenacciato 'a l'inferel guarriere!
'A lettera riceva: — “O rolce Cano
vieni a dar soccorranza al tuo Magnate
lasciato sol dall'oste crestiano!„
Ma ll'oste mo', nun era 'o tavernaro!
Se chiammava oste 'a truppa r''e surdate,
e 'o Magnate era Carlo, a parlà chiaro!
- XX.
Ritornò il messo a Carlo Mano in Franza
e purtai sta mmasciata: “Inclito sire!
Stanno venenno ccà dalla Macanza
trecientumilia fanti, e pien di ardire!
E pien d'ardire e pien di ordacotanza!
E nce stevano 'e Turche nire nire....
E sopra ai monti tengono lor stanza
ed han giurato di farvi morire!„
Sentenno chesto Carlo 'o mperatore
c'avea perduto 'e meglie palatine,
appaurato accummencia a tremmà;
ma il vecchio Ugone dicette: — Signore,
manda araldi per monti e per marine!
Ammola 'e fierre! E nun te scuraggià!
- XXI.
Subbeto Carlo manna na staffetta
in Egitto, nell'Africa e in Anglante;
trovati i palatini, in fretta in fretta,
l'accumpagnasse 'n Frangia a tuttuquante!
Ognuno 'e lloro, comm'a na saetta
jette piscanno Orlando e Bradamante,
Linardo, Astolfo, Guido... Aspetta, aspetta,
o Carlo Imperator, tutto tremante!
— O Linardo mio forte! O prote Orlando!
O ferele Ruggiero! O Astolfo mio!
Dove siete, raminghi, alla ventura?
Dove, o per chi, combatte il vostro brando?
Ohimè c'or veggo il mio gran torto, o Dio!...„
Guè! Se mettete na brutta paura!
- XXII.
— Giesù, Giuseppe, Sant'Anna e Maria!
Ncopp''o munno nce sta 'sta razza 'e gente?
Primma n''e mmanna, e po'... Maronna mia,
me fa venì n'arraggia! Tiene mente!
— Siente, si fosse Turco, 'accedarria!
— Zi-To', pe ggentilezza, nu mumente....
Rico accussì, nun è na ciucciaria,
chesta, pe parta soia?.. — Sicuramente!
— Ma rich'io, po', Zi-To', che cumbinaie?
Che facette 'o Magnate senza lloro?
— Peppi, chillo venetteno, 'e guarriere!....
— Nu mumento! Aspettate! E che ne saie?
“Carlo chiama i ministri a concistoro
e chiama all'arme ciascun cavaliere„.
- XXIII.
Tutti i guarrieri dal lor sire andorno,
(ca vene a di' ca jetteno)... Sentite!
Fravicatori i muri fravicorno...
'Nzomma, pe v''a fa corta, me capite?
mettetteno surdate intorno intorno
alle mura ca fuino ben guarnite,
ogne mumento si senteva il corno
degli araldi squillar, che a giostra invite!
Cu tutto chesto 'o re cu 'a tremmarella
priava a tutt''e sante 'mparaviso
ca fosseno turnate 'e palatine!
Nu juorno s'appresenta Alda la Bella,
'a mugliera d'Orlando, e smorta in viso:
— Carlo! L'oste nemica s'avvicine!
- XXIV.
Tanno, 'e ffemmene 'e tanno erano cose
ca mo' sule pittate 'e ppuò guardà!
Vocche addurose 'e zuccaro e de rose,
uocchie 'e velluto fatte pe' ncantà!
Niente pumate e pòvere nguacchiose
c'usano mo' nell'arda Sociatà!
Niente tente 'e capille, acque addurose...
Erano scarde 'e primma qualità!
Stive llà mmiezo? E te cumprumettive!
Uh mamma mia che robba prelibbata!
Robba riala comm''o vino 'e Puglia!
Verive a una 'e chelle? E tu murive!
Una vutata d'uocchie, una guardata,
e t'appicciave comm'a na pampuglia!
- XXV.
Femmene ca zumpàvano a cavallo,
pigliavano na lancia e na sfarziglia
e jevano a fa guerra int'a nu vallo
e currevano tappe 'e ciento miglia!
Tenevano 'a curazza 'a sott''o sciallo,
'e guante 'acciaro pe guante 'e setiglia;
'a guerra era pe lloro 'a festa 'e ballo!
Ievano frate e sore, mamma e figlia!
Basta: turnammo a nuie: steva cuntanno
ca Carlumagno aveva avuto avviso
d''o nemico che steva p'arrivà...
Isso se mette a correre affannanno:
— A me fedeli miei!..: Ma miezo acciso,
Se nzerra int''a cucina... e resta llà!
- XXVI.
Uh che nce fuie! Sentite! 'O sango a sciummo
scurreva per le terre del franzese;
s'abbruciavano 'e ccase, e mmiezo 'o fummo
s'avanzavano 'e truppe int''o paese!
Carlo pareva nu mbriaco 'e rummo
e implorava il Signore a braccia tese,
e nu turco, cu tanto nu sfranzummo
faceva stragge, e a terra ha già distese
tre cumpagnie d''e nuoste! Allora 'o riesto,
abbeluto, vattuto, appaurato,
avota 'e spalle, e se mette a fuì!
'E macanzise appriesso... Priesto! Priesto!
Vittoria.... E sulla porta è inarberato
il gran stannardo di Mametto-Alì!
- XXVII.
-Ah carogne! Tezzune, trariture!
E Gano po'?... — Chillo nun cumparesce!
.... i maganzesi salgon per le mure....
— Io Gano aggia verè quann''a fernesce!
— Ch'erano addeventate, criature,
'e francise, Zi-To'... — "Lo timor cresce,
quanno se vede scenner dalle ardure
auti mmulignanelle!... Il Turco accresce!...
— Poveri figlie!... Mmano 'e maganzise....!
— Secutate da 'e Turche.... E tutto chesto,
Pe Gano!... — Nu schiaffiere!... Ma addò sta?
— Ma 'o libbro dice si murette acciso?...
—... In questo s'ode il rimbombar funesto
d'una voce: — Curaggio!... Stammo ccà!...
- XXVIII.
—Overo, neh Zi-To'?... — Zitto! Mannaggia!
— Erano 'e palatine?.... Sì?... — Gnorsì!
Bravo!...(Ciccì, me sta passanno 'arraggia!)
— Ma tu comme sì chiòchiaro accussì!...
Perdevano 'e francise?! “Oh! mai non caggia
il valor della Francia! „ E vvire, vi'!
“Ad altre terre, o gente turca, viaggia,
io son Linardo!.... „ Mo' nc'è da sentì!
Se votta mmiezo su la gente fella....
Che sciabbulate, neh! Ma chi v''o ddice!
Comm''e mmosche carea la gente infida!
A Carlo lle passaie 'a tremmarella!
O Carlo Mano, or più tremar non lice,
e doppo il chianto convien che si rida!
- XXIX.
Lassàimo i palatini andar pel mondo,
passanno sciumme, muntagne e desierte!
Solo Linardo sta congitabbondo
penzanno 'a causa pecchè vanno spierte.
Arrivano al castiello d'Ariomondo,
vèdeno tutte li ffeneste aperte,
na luce 'e fuoco, e in un antro profondo
un alimalo spaventoso e inerte!
S'accostano: la fiera, risturbata,
arape 'a vocca nnanza a Vigliantino!...
Ma Linardo ca sape 'o juoco 'e ccarte,
abbraccia 'a langia, dà na sperunata,
e cu tutt''o cavallo, 'a llà vicino,
lle zompa mmocca, e ghiesce 'a ll'ata parte!
- XXX.
Orlando, Astolfo e ll'ati cumpagnune,
corrono, ntanto, sotto a stu castiello,
s'arrànfano pe faccia a li balcune,
e giungon nell'interno dell'ostello.
Dinto nce sta nu fieto de ggravune,
ca v'assicuro, nun è troppo bello...
Vanno truvanno 'a ggente, ma nisciune
accumparesce!... Era d''o Munaciello!
—Che facimmo? Scennimmo? Nce ne jamme?
—Menamme quatto mazzate 'a cecate!
dice Orlando; na cosa ne cacciamme!
E ditto nfatto, mena sciabbulate!
Crolla tutto il castiello mmiezo 'e sciamme,
e 'a sotto acumparèsceno tre Fate!
- XXXI.
— Neh, neh! dice Linardo, neh, vedite
sti piccerelle ccà quanto so' bbone!
'A do' venite?... 'E qua' paese site?
Vuie site overe tre simpaticone!
Orlando dice: — Nun ce canuscite?
Nuie simmo i palatin di re Carlone!
Si ve mmitammo a cena... nce venite?
E... sapite cantà fronn''e limone?
Ma chelle, zitte! 'A fata, se capesce,
nun po' parlà! Nun parla mai c''a ggente!
Si no, fernesce 'o ncanto, e se traresce!...
Ognuno 'e chille a ll'ato tene mente,
e penza ognuno: — Ccà, chi sa che n'esce!
Nce avarranno pigliate pe sturiente!...
- XXXII.
Ma dinto a nu mumento se fa notta
e se fa niro 'o mare e niro 'o ciele!
Ccà 'o libbro tene na chiammata sotta
ca giura ca sti ccose so' vangele!
Uno 'a vo' crura, e n'àvuto 'a vo' cotta;
è 'o fatto 'e chillo c'accattava méle!...
S'appìcceca, po' vene 'o votta-votta,
more acciso, e l'appìcciano 'e ccannele!
Perciò, ccà è meglio ca turnammo a nuie!...
'O certo è chesto, c'arrivàino 'ntiempe
'e palatine, mmiezo 'o fuie-fuie...!
'E francise repìgliano curaggio,
e 'o mperatore ca chiagneva sempe,
mo' rire e dice: — È stata n'acqua 'e maggio!
- XXXIII.
E ride Carlo.... Ma linardo no!
Galoppa sempe cu la spata mmano,
cu ll'uocchie comm''o ffuoco...
—Jammo, To',
Jammo! —E va ncerca 'e chillo puorco 'e Cano!
Slangisi in mezze!... E mille n'ammazzò
con un sol colpo! E: traritor villano!
per tutto il campo attorno sì gridò,
fatti sotto assassin cane marrano!
E uccide e mai non sta! Ma 'o macanzese
c''a sapeva cchiù longa de nu mago
che buò truvà! È fuiuto? È muorto?... È vivo?
E allor sbruffando il palatin franzese
de' Turche fa na stragge.... E il campo è un lago
'e sango!... E se capisce! P''o currivo!
- XXXIV.
E che veriste neh, llà mmiezo llà!
'E ccape ruciuliaveno pe terra
comm'a ttanta nucelle! 'E ssape dà
Linardo nuosto, che! Cu chella guerra!
chilli nemice! Se vò vendicà?
S''a miso ncapo? Embè, piglia na sferra,
na mazza, na cannuccia, e 'e fa scappà!
E c'ammuina neh! Che serra-serra!
Gan da Pontiere intanto, salta in croppa,
e abbandonando il campo suo, sen parte
pe ffureste e buscaglie priesto priesto,
vere na casarella e llà caloppa...
Ma mo è fatt'ora, va, nzerrammo 'e ccarte,
piacenno a Dio, a n'auto ppoco 'o riesto!
- XXXV.
— Limone, acqua, acquaiuolo!. — Viene 'a ccà,
ramme na giarra semprice! — Zi-Tò!
'O macanzese po'.... Se fa acchiappà?...
— Nun ce 'o ddicite!... — Comme masto Ntuò,
e site vuie!... Ma nun se fa afferrà,
Gano 'e Macanza! Che ve pare, mo'!
'A sape tanto longa!... Scapparrà!...
— Gniernò! — Gnorsì! — Embè, Linardo, po'?
— 'O spassatiempo! — Rì cientè 'e semmente...
Addonca, ve ricevo: 'o palatino
nun ll'assecuta? Nun l'arriva, che?
Vuò fa jì na scummesa? Tiene mente!
Guè ma vì comm'è ttuosto stu Peppino!
L'arrivarrà, Linardo, siente a mme!
- XXXVI.
"..... Lassàimo a Ganellone da Pontiere
ca fuieva a Linardo a grand' imprese.
A una casetta il traritor guarriere
caloppa per sottrarsi dal franzese.
Venimmoncenne mo... Arriva e scese...
Ganellon rio scennette dal destriere...
Capite?... Facea càuro... 'O macanzese
alla porta s'appressa, ed il cimiere
s'avea luvato 'a capo. Tuzzulea
tenennose 'o cavallo pe la bbriglia,
tuppe-ttu! Tuppe-ttu!... Nisciuno arape!...
Chesto comme se magna? murmulea...
Chesto che vene a dì?... Ngruttesce 'e cciglia
e picchia. Ma che niun non v'è non sape!
- XXXVII.
Tuzzulea chiù forte. E che buò aprì!
Quella magion era disabitata!
Dieci anni avanti un mago vi morì
lo qual viveva vita ritirata.
Gano nun sape niente. “ E che vo' dì? „
fa ncapo a isso. “ Fosse abbandunata? „
Aüsulea... e lle pare 'e sentì
muliebbra una voce... Era na Fata!
“ Aprite, grida il sire di Macanza
tutto arraggiato, stracquo, e cu 'a paura
de Linardo ca 'o va piscanno ancora;
“ Aprite! „ grida con oltracotanza,
si no pe Cristo mo' sfonno sti mmura!
Nzomma po' 'a Fata aprette, a la bonora!
- XXXVIII.
Pe ttramente traseva, da luntano
sente 'o scapulià di un destriere!...
Uh ssanto Ddio!... È turco? È crestiano
chisto che sta venenno? È nu guarriere....
La lancia in resta.... forse è mussulmano...
Ma no! Una croce spicca sul cimiere....
È Linardo! Il bel sir di Montalbano
che grida: — Empio fellon! Gan da Pontiere!
-Ah finarmente! L'ha afferrato?... — 'Accire?
— S''o magna? — 'O sbrana, a chillo traritore?
— 'O spacca 'a capa, o no! — Mò! Nu mumento!
”Egli è Linardo!„ di Macanza il sire
ntartaglia, gialliato dal terrore....
Zompa a cavallo, e allippa manc''o viento"!
- XXXIX.
Nun ve vene ll'arraggia!?.. Nun chiagnite?
N'ati ttre ppasse, e 'o steva p'afferrà!..
Io mo'songh'io... embè, che ve crerite?
Patisco sempe, quann'arrivo ccà!...
Truvateme int''o libbro 'e meglie site
d''e gguapparie ca fanno chilli llà,
embè, verite vuie si nun verite
ca Gano scappa e nun se fa truvà!
Io sa' che ssaccio? Quanno l'ommo è nzisto
ca tu sai ch'è mmarvaggio, e si lle vene
te mette 'n croce pure a Giesù Cristo,
ggiúrace, ca chill'ommo è affurtunato!
Campa cient'anne, e tutto lle va bbene!
E chisto è fatto! Scìveto e ppesato!
- XL.
Tu piglie a uno a uno 'e palatine,
ggente ca te cumbatte pe na fère,
embè, tu va te nforma a qua' festine
se so' spassate chilli cavaliere!
Sempe 'n battaglia cu li sarracine,
sempe vestute 'e fierro 'a capo 'o pere!
Sempe cu li pericule vicine!
Scanze ogge chillo ch''e scanzato ajere!
Mo' dinto a na furesta cu nu Mago,
mo' dint' a nu deserto c''o lione,
mo' cu nu serpe 'e fuoco o cu nu drago..
Piglia a Linardo!... Chillo quanno maie
s'arrepusava ncopp'a nu paglione!...
Me pareva Pascale Passaguaie!
- XLI.
Pe farve cchiú capace, chesta storia
ll'ha scritta ll'arcivescovo Vurpino,
n'ommo de cchiesia ca murette ngloria,
nzieme cu Mmalaggiggio e re Pipino!
Miezo prèvete e miezo palatino,
chillo sant'ommo, pe fforza 'e memoria,
se signava ogne fatto, e ha scritto anfino
a quanno è mmuorto cantanno vittoria!
E chisti ccà so' ffatte, tale e quale!
Io nun ne levo e nun me metto niente!
'O libbro parla, e parla naturale!....
'E primme perzunagge 'e chilli tiempe
nce perdèvano 'e meglie sentimente...
E sti patute nce so' state sempe!...
- XLII.
Io stesso, embè, cherè, nun so' ppatuto?
Si me facite ll'atto cu stu rite,
nun arrivate a farlo e so' ccaruto!
Me vene 'o mmale 'e luna, che credite?
Pe tutt''o munno, a 'e cchiù desierte site,
chill'ato è n'atto troppo canusciuto!
Chiammàte 'e primme mierece e verite!
Te piglia n'anziatà, c'uno è perduto!
Pecchè? Pecchè te pare ca Linardo
signato cu 'a bacchetta d''a fattura
cade 'a cavallo e perde ogne virtù!
Pe me, m'abbatto comm'a nu mallardo
cuòveto dinto 'a scella, a na chianura....
Quanno è caruto, nun se sose cchiù!
- XLIII.
Nce pazzïate? E addò sta cchiù 'sta ggente?
V''o ffanno 'e Rre?... V''o ffanno 'e ggenerale?
Tanno, vestute 'acciaro stralucente,
Mo' se po' ddì, ncartate int''e giurnale!
Tanno 'o guarriere ch'era cchiù alimale,
a cuntà poco, ne stutava ciente!...
Mo' vanno nterra cu nu sciuscio 'e viente!
Mo' correno cu l'acqua turriacale!
Mo', si se tratta 'e secutà 'nu cane,
va tutta 'a squatra, armata c''o cannone!
E sparano, da mo' fino a dimane!
Quann'io ero ggiandarme a Cardetiello,
nu sargente, 'e casato de Simone,
si sghezzacava s'arapeva 'o mbrello!
- XLIV.
— Embè, te faie 'a risa, Pascariè?...
Chillo, zi-Tore, chillo ha pazziato!...
'A ggente 'e core, tu n''o può sapè,
stevano pure 'o Cuverno passato!...
— Ma cu chi ll'aie?... Cu me?... — Proprio cu tte!
— E te si' tanto brutto amariggiato?...
Fusse paluto 'e Francischiello, neh?...
Io ll'at'anno so' stato cungerato!
Va llà, vattenne!... Mièttete cu 'e viecchie!..
'O ssaccio, che buò rì!... Si' cammurrista?...
Ma nun m''a faie, na tiratella 'e recchie!...
Vo' fa causa, ca ncoppa Santu Rocco
ll'atriere a ssera, int''a cantina 'e Lista
nun l'aggio rato a bèvere, int''o tuocco!
- XLV.
— Embè... si fosse pe sta mutivanza?
Nu masto nun te chiamma all'ubberienza?
Sì ppicciuotto?.. E picciuotto 'e qua' paranza?..
Famme 'o ssapè, pe na cumpiacenza!...
— Guè...T'aggio ritto! Io nun te rongo aurienza!
Maronna mia, acconcia sta valanza!...
Mo' me ne vaco, va! Vutammo 'a renza,
si no ccà faccio avero na mancuanza!
Chillo è suggetto 'e pruvucazzione!
Me fa n'aggrisso a me, pe ssenza niente,
e po' se n'esce... è Masto!... Aie raggione!...
Vuò ca te cerco scusa? Una parola:
Stasera, rint''o vico 'e Sette-Viente...
Signori belli!... Me fa male 'a mola!...
- XLVI.
— Stasera?... Ma cher'è, nu spusarizzio?...
ch'è, na figliata?... Ch'è, na funzione?...
te so' ttanto ubbricato r''o servizzio,
ma i' frijo e magno!.. 'O Masto nzegna e mpone!..
Me staie facenno tanto 'avucellone,
e che te crire, io nun te levo 'o sfizzio?...
Stateve zitte vuie!... Chillo 'O guaglione
sape ll'uffiggio suio!... Ten' unu vizzio!...
Ma quant'è vvera 'a Mamma 'e Munzerrato,
io nun 'o tocco!... Ll'aggia ri' na cosa...
Guardate ccà... nun stongo manco armato...
Vene na mosca?... Embè, uno n''a caccia!...
Sarrìa na cosa overo curiosa
si tu, a na mosca, lle ntaccasse 'a faccia!...
- XLVII.
— Pozzo rìcere io pure na parola?...
Io songo 'o Cantastorie... nc'è purmesse?
Si v'avite spanzà, facite ampresse,
ma si avite 'a parlà, ve faccio 'a scola...
A Pascariello lle fa male 'a mola,
e si se ne vo' jì, ca se ne jesse!
E don Ciccio ch'è viecchio, canuscesse
ca ccà se campa meza vota sola!
Sa' che succede?... Vuie v'appiccecate,
còrreno 'e gguardie, arrestano a cchiù d'une
pò vonno sapè 'o fatto comm'è state...!
E dopp''e chesto, ca se so' nfurmate,
te fanno un'erba fascio 'e sti guagliune,
e va pure Linardo, carcerate!